Berst með kjafti og klóm til að viðhalda menningarstarfi

„Ég er staðfastur í því og viss um að það verður einhver flugeldasýning í gangi," segir Einar Örn Benediktsson, borgarfulltrúi og formaður menningar- og ferðamálaráðs, um flugeldasýninguna sem venjulegast markar endalok Menningarnætur Reykjavíkurborgar. Hann bendir á að flugeldasýningin hafi verið kostuð af fyrirtæki sem sé Orkuveita Reykjavíkur. Ef það fyrirtæki sjái sér ekki fært að kosta flugeldasýninguna áfram þá verði að leita annarra leiða. Jón Gnarr borgarstjóri hefur hins vegar viðrað þá hugmynd að hætt verði við flugeldasýninguna

Einar segist ekki vera viss um hvort líta megi á flugeldasýninguna sem sjálfstæðan menningaratburð eða hvort að um sé að ræða hluta af menningaratburði. En hann segir alveg víst að hann vilji ekki sjá niðurskurð til menningarmála. „Ég myndi frekar vilja sjá aukningu til menningar í Reykjavík frekar en hitt. Því að aðsókn á söfnin, bókasöfn og listasöfn í Reykjavík hefur aukist jafnt og þétt," segir Einar. Hann segir að það verði barist með kjafti og klóm til að viðhalda því menningarstarfi sem nú þegar sé unnið á vegum borgarinnar. En hann bendir á að horfa verði á flugeldasýninguna í víðu samhengi. Jafn mikið fé fari í flugeldasýninguna og Reykjavíkurborg ver í rekstur lítils danshúss. „Hvort er meira virði að setja það í danshús eða flugeldasýningu," spyr Einar Örn.

„Er hægt að hafa flugeldasýningu svo að björgunarsveitin fái peningana. Svarið er já. Við munum leita leiða til að finna aðila að flugeldasýningunni," segir Einar sem klikkir út með því að segja að það hafi líka komið upp hugmynd um að láta friðarsúluna í Viðey blikka ótt og títt í staðin fyrir flugeldasýninguna. „Ég myndi þá vilja að hún blikkaði þrjú löng, tvö stutt og þrjú löng," segir Einar.