Fletcher: Börðumst fyrir stigunum þremur

„Þetta var erfiður leikur og kannski ekki mikið um flottan fótbolta," sagði Darren Fletcher, miðjumaður Manchester United, eftir sigurinn gegn Liverpool í dag.

„Maður vill vinna titilinn með fallegum fótbolta en stundum þarf baráttan að bera fegurðina ofurliði. Við sýndum karakter."

Fletcher telur að ákvörðun Howard Webb að dæma vítaspyrnu hafi verið rétt. „Mér fannst þetta klárlega vera brot. Snertingin við löppina á Valencia kom rétt inní teignum. Vítaspyrnan var varin en Wazza (Rooney) er svo einbeittur að hann fylgdi eftir," sagði Fletcher.

United er í harðri baráttu um titilinn. „Það lið sem sýnir mestan stöðugleika mun líklega enda uppi sem sigurvegari," sagði Fletcher.

Sir Alex Ferguson, stjóri Manchester United, telur að Javier Mascherano hefði átt að fá rautt spjald fyrir brotið á Valencia. „Ég get ekki séð hvernig nokkur maður hefði getað komið í veg fyrir skot frá Valencia. Þetta var upplagt marktækifæri og Mascherano verðskuldaði rautt," sagði Ferguson.

„Þetta var mjög jafn leikur og lið Liverpool er gott í að stöðva flæði andstæðingsins. En við sýndum þolinmæði og markið frá Park Ji-sung var frábært. Hann átti enn einn stórleikinn og hefur reynst okkur mikilvægur."