Ferdinand: Kominn tími til að vinna Liverpool

„Við höfum tapað síðustu þremur leikjum fyrir Liverpool. Þeir leikir hafa ekki alveg farið eins og við lögðum upp. Það er allt hægt að bæta og nú er kominn tími á að við vinnum þá."

Þetta segir Rio Ferdinand í viðtali við heimasíðu Manchester United. Rauðu djöflarnir taka á móti Liverpool í dag í stórleik helgarinnar í enska boltanum.

„Liverpool er meðal helstu erkifjanda okkar og það er aldrei gott að tapa fyrir þeim. Ég er viss um að við getum tekið öll þrjú stigin á sunnudag og stöðvað þessa sigurgöngu þeirra á okkur," segir Ferdinand.

„Við þurfum að ná fram okkar besta leik því ef Liverpool hittir á góðan dag eru þeir frábært lið. Þeir hafa vissulega ollið vonbrigðum á þessu tímabili."

Ferdinand hefur tvívegis á ferlinum skorað gegn Liverpool, annað þeirra var eftirminnilegt sigurmark tímabilið 2005/06. Hitt kom í 2-0 sigri tímabilið þar á eftir og var glæsilegt. „Það er skandall að það mark hafi ekki verið valið mark tímabilsins!" segir Ferdinand kíminn.