Hvað gefurðu fótboltamanni sem getur fengið allt?

Móðir Theo Walcott hefur hugsað út í þessa spurningu í fyrirsögninni samkvæmt viðtali við kappann í The Sun. Walcott varð 21. árs í vikunni og ætluðu félagar hans að halda fyrir hann óvænt teiti.

Það varð þó ekki óvænt eftir að liðsfélagi Walcott hjá Arsenal, Armand Traore, kjaftaði óvart frá. Teitið var þó haldið og heppnaðist víst gríðarlega vel.

„Nokkrir leikmenn létu sjá sig sem var virkilega ánægjulegt. Ég fékk nokkrar góðar gjafir. Mamma mín sagði alltaf að það væri ekki hægt að velja gjöf handa fótboltamanni sem getur fengið allt en ég er þakklátur fyrir það sem ég fékk," sagði Walcott.

„Ég fékk allskonar hárvörur þrátt fyrir að ég sé ekki með hár. Ég fékk fallegt armband frá kærustunni minni. Ég fékk vekjaraklukku enda er ég latur og svo fékk ég fuglafóður."

Það má segja að Walcott eigi allt nema verðlaunapeninga. Það eru þó spennandi tímar framundan hjá leikmanninum. Arsenal er komið áfram í Meistaradeildinni og í harðri baráttu um Englandsmeistaratitilinn. Þá vonast Walcott eftir að vera í landsliðshópi Englands á HM í sumar.