Bebe ætlar að verða eins og Ronaldo

Bebe vonast til að fylgja í fótspor Cristiano Ronaldo hjá Manchester United. Leiðir þeirra hafa þó verið ólíkar.

Báðir eru reyndar frá Portúgal og báðir fóru þaðan til United. Bebe hefur þó verið heimilislaus á meðan Ronaldo var talinn mikið efni snemma á ferlinum.

Bebe er aðeins tvítugur og hann ætlar sér að verða einn sá besti í heimi.

"Það er draumur að koma til félags eins og Manchester United. Portúgalski þátturinn hérna hafði áhrif á mig," sagði Bebe.

"Það eru stór nöfn eins og Cristiano Ronaldo sem hafa spilað hérna og hann er mjög stórt nafn núna. Nani og Anderson eru báðir hjá félaginu. Ég vil verða eins og þeir og ég ætla að leggja hart að mér til að verða gæða leikmaður," sagði hann.