West Ham á að fá Ólympíuleikvanginn

West Ham vann sér inn stig í dag í kapphlaupinu um Ólympíuleikvanginn í London. Borgarstjóri svæðisins sem leikvangurinn verður á sagðist þá vilja að Hamrarnir flyttu þangað eftir leikana.

Ólympíuleikarnir fara fram í London árið 2012 og nýr og glæsilegur leikvangur verður á lausu eftir leikana.

Tottenham og West Ham vilja bæði flytja á leikvanginn sem getur tekið allt að 60.000 manns eftir breytingar í kjölfar leikanna.

Sir Robin Wales heitir borgarstjóri Newham, þar sem völlurinn verður.

"West Ham verðskuldar leikvanginn," sagði hann. "Félagið þarf alvöru leikvang eftir 2012," bætti hann við.