Langur ratleikur í Hafnarfirði

Ratleikur Hafnarfjarðar fer af stað á morgun en þetta er í fjórtánda sinn sem ratleikurinn er lagður.

Alls eru 27 merkjum komið fyrir í bæjarlandinu og í nágrenni þess, sumum nálægt bænum en öðrum marga kílómetra út í hrauni.

Þátttakendur fá  ratleikskort með vísbendingum og hafa svo allt sumarið til að finna þessi merki og skrá hjá sér númer þeirra, segir í tilkynningu.

Fyrir 21. september geta þátttakendur skilað inn lausnablöðum með 9, 18 eða 27 lausnum.

Dregið verður úr innsendum lausnum og Léttfeti 2010 verður sá heppni sem dreginn verður úr 9 merkja leiknum, Göngugarpur 2010 sá heppni í 18 merkja leiknum og Þrautakóngur 2010 sá heppni í 27 merkja leiknum.

Fjölmargir vandaðir vinningar eru í boðið og er verðmæti þeirra samtals um 250 þúsund króna sem hafnfirsk fyrirtæki hafa lagt til.

Hafnfirsk fyrirtæki styrkja útgáfu leiksins en aðalstyrktaraðili leiksins í ár er Rio Tinto Alcan. Hönnunarhúsið ehf. vinnur leikinn fyrir Hafnarfjarðarbæ.

Hægt verður að nálgast ratleikskortin í Hafnarfirði í Þjónustuverinu, á sundstöðum, bensínstöðvum og bókasafni.

Leikurinn nær yfir bæjarlandið vítt og breytt og jafnvel út fyrir það. Þátttakendur eru leiddir á staði með því markmiði að fólk kynnist bæjarlandinu um leið og menn njóta hressilegrar útivistar.

Þema leiksins í ár eru hleðslur. Íbúar fyrri alda hafa nýtt landið mun betur en við gerum í dag og víða sjást umerki eftir þá, sum áberandi og önnur sem næstum eru horfin. Ekki er alltaf langt á milli merkja og er þá verið að vekja athygli á því hversu mikið fólk fyrri tíma lagði á sig í lífsbaráttunni og hversu vel landið hefur verið nýtt.

Leikurinn fer formlega af stað á morgun, föstudaginn 11. júní kl. 15.30-16 og verða fyrstu ratleikskortin afhenti í Þjónustuveri bæjarins í Ráðhúsi Hafnarfjarðar, Strandgötu 6.