Jamie Carragher: Við getum bjargað okkur án Gerrard

Jamie Carragher ætlar að gera sitt besta í að reyna að tala trúna í leikmenn Liverpool eftir að ljóst var að Steven Gerrard verður frá í fjórar vikur vegna meiðslanna sem hann varð fyrir í landsleiknum á móti Frakklandi á miðvikudaginn.

"Það er enginn vafi á því að við munum sakna Stevens, hvort sem við vinnum, gerum jafntefli eða töpum, því hann er það mikilvægur leikmaður fyrir okkur," sagði Jamie Carragher sem mun taka við fyrirliðabandinu hjá Liverpol í fjarveru Gerrard.

"Það er undir okkur hinum komið að standa okkur og minnka þetta áfall eins og þegar við unnum Tottenham í janúar án Gerrard og Fernando. Við getum bjargað okkur án Gerrard," sagði Carragher. Liverpool hefur aðeins tapað 2 af 16 leikjum án hans undanfarin fjögur tímabil.

Fyrsti leikur liðsins án Gerrard verður á móti West ham á Anfield á morgun.