Stórtækir þjófar á ferð á Nesjavöllum

Lögreglan í Árnessýslu rannsakar nú innbrot í Hótel Ásbúð við Nesjavelli, sem uppgötvaðist í gær, en þar er ekki rekstur í vetur. Þaðan var stolið sófum, rúmum, stólum og borðum, svo það helsta sé nefnt, og er ekki vitað hverjir þar voru á ferð.

Ljóst er að fleiri en einn þjófur hefur verið þar á ferð og hafa þjófarnir verið á stórum bíl til að rúma allt þýfið. Að sögn lögreglu minnir þetta óneitanlega á innbrotið í vinnnubúðir verktaka við Herdísarvík nýverið þar sem tækjum og búnaði úr eldhúsi búðanna var stolið, auk verkfæra. Það mál er enn óupplýst.