Endurreisninni haldið í gíslingu

Ungir jafnaðarmenn hvetja til lausnar Icesave málsins og benda á þann kostnað sem hlotist hefur af frestun málsins frá áramótum sem ekki sjái enn fyrir endann á. „Þessi kostnaður telur milljarða króna á meðan áætlun stjórnvalda um endurreisn efnahagslífsins er haldið í gíslingu flokkspólitískra deilna," segir í ályktun UJ.

Þar segir að seinkun framkvæmda í stöðugleikasáttmála, lengri og dýpri kreppa með auknu atvinnuleysi, enn frekari lækkun lánshæfismats ríkisins og kostnaður samfélagsins í glötuðum verðmætum hleypi á tugum milljarða króna á mánuði.

Ungir jafnaðarmenn telja grafalvarlegt mál að uppnám við lausn Icesave málsins geti komið í veg fyrir fjárhagsstuðning frá Norðurlöndunum og Alþjóðagjaldeyrissjóðnum, sem þýðir að þeirra mati að Ísland gæti lent í því að hafa ekki upp á neinn neyðargjaldeyrisforða að hlaupa verði vandræði við fjármögnun afborgana erlendra lána árin 2011 og 2012.

„Óvissan er okkar versti óvinur um þessar mundir og eins og oft hefur verið bent á þá er það traust sem skiptir íslenskt atvinnu- og efnahagslíf mestu máli við endurreisnina. Án þess er öll fjármögnun bæði fyrirtækja og hins opinbera nær ómöguleg," segir í ályktuninni.

Að lokum benda Ungir jafnaðarmenn á Icesave skuldaklukkuna á heimasíðu sinni. Þar má sjá þróun þessa kostnaðar sem töf málsins felur í sér frá áramótum byggða á útreikningum Gunnlaugs H. Jónssonar, hagfræðings. Samkvæmt útreikningum hans nemur kostnaðurinn við kyrrstöðu í atvinnulífinu að lágmarki 75 milljörðum á mánuði miðað við þær forsendur um hagvöxt sem hann gefur sér, að fram kemur í ályktun UJ.