Martínez sagði dómara ljúga og fékk ákæru

Roberto Martínez, knattspyrnustjóri Wigan, hefur verið ákærður af enska knattspyrnusambandinu fyrir ummæli sín um dómarann Stuart Attwell eftir leik gegn Manchester City.

Martínez gagnrýndi ákvörðun Attwells að reka af velli varnarmanninn Gary Caldwell. Hann sagði að Attwell hafi ekki getað séð atvikið nægilega vel og ásakaði hann um að ljúga.

„Við erum allir mannlegir og gerum mistök. En að taka ákvörðun um eitthvað sem þú sást ekki er bara lygi. Það er erfitt að sætta sig við að hann hafi búið eitthvað til. Hann sagðist hafa séð Gary Caldwell fara í tæklingu með báðar fætur. Þess vegna gaf hann rauða spjaldið. En Gary fór aðeins með einn fót í tæklinguna. Þetta er ósanngirni," sagði Martínez.

Martínez hefur tækifæri til 22. apríl til að svara ákærunni.