Vopnað rán í 10/11

Tilkynnt var um vopnað rán í 10/11 verslun í Álfheimum, Glæsibæ klukkan tuttugu mínútur í tíu í morgun.

Maður á þrítugsaldri hafði komið þar inn og hótað afgreiðslustúlku með blóðugri sprautunál og heimtað peninga. Maðurinn hafði óverulega upphæð út úr þessu enda hefur verslunin, eins og flestar aðrar verslanir, sérstaka vörn gegn ráni. Vitni gátu gefið lögreglu greinargóða lýsingu á manninum og sögðu hann hafa hlaupið í átt að Laugardalnum.

Lögreglan kom síðan að Laugardalnum úr öllum áttum og var búin að finna hinn grunaða um tíu mínútum síðar Hann var með ránsfenginn í öðrum sokknum en hafði áður kastað sprautunni frá sér. Maðurinn, sem var í annarlegu ástandi, var færður í fangageymslu lögreglunnar og verður yfirheyrður síðar. Hann hefur áður komið við sögu lögreglu.