Höskuldur: Eigum að standa með sjálfum okkur

„Kosningabaráttan á að snúast um komandi kynslóðir, hvort við ætlum að velta byrðum nútímans yfir á börnin okkar og börnin þeirra," segir Höskuldur Þórhallsson, þingmaður Framsóknarflokksins.

Hann segir að það versta sem gæti gerst í aðdraganda þjóðaratkvæðagreiðslunnar um Icesave væri að baráttan færi að snúast um líf ríkisstjórnarinnar. „En ef að hún kýs að stilla málum þannig upp að þá er ég reiðubúinn í þá baráttu," segir Höskuldur Þórhallsson. Hann segir að eins og ríkisstjórnin hafi haldið á Icesave málinu hafi hún sýnt algjöra vanhæfni til þess að fara með hagsmuni íslands í þessu máli.

Höskuldur segir að allur hræðsluáróðurinn og allt sem hafi verið sagt byggist á órökstuddum fullyrðingum og í mínum huga rangri túlkun á því sem sé að gerast erlendis eins og hafi ítrekað komið fram. „Það er eitt sem er athyglisvert og hefur ekki verið haldið nógu vel til haga í umræðunni. Bretar neita að borga íbúum á Mön fyrir mistök breskra banka sem voru stofnaðir þar vegna þess að íbúar á mön fengu skatttekjur af reikningunum. Samt ætlast þeir til að íslendingar geri hið sama. Þetta sýnir fáránleikann í þessu máli," segir Höskuldur.

Höskuldur segist ekki hafa nokkrar áhyggjur af því að það komi tímabundið bakslag í endurreisn efnahagslífsins. „Það hefur ekki reynst grunnur á bakvið neitt það sem hefur verið hótað hingað til af hálfu ríkisstjórnarinnar," segir Höskuldur. Spurningin sé sú hvernig slíkar fullyrðingar séu rökstuddar.

„Því var hótað að eitthvað stórkostlegt myndi gerast hér 23. október. Það reyndist alrangt. Endurreisn bankakerfisins átti að vera ómöguleg, en henni er meira og minna lokið. Við höfum fengið lán frá Alþjóðagjaldeyrissjóðnum og hann fullyrðir að þetta hafi ekkert með Icesave að gera," segir Höskuldur. Matsfyrirtækin séu lítill hluti af þessu öllu saman. Standard & Poors hafi nánast með engu breytt mötum sínum efnahagshorfum. „Við eigum að standa með sjálfum okkur í þessu máli og þá mun okkur farnast best," segir Höskuldur.