Capello: Finn til með Beckham

David Beckham mun í dag gangast undir aðgerð á hásin en hún verður framkvæmd í Finnlandi. Hann meiddist í leik AC Milan og Chievo og verður frá í fjóra mánuði.

„Það lítur út fyrir að hann verði ekki með á HM í sumar," sagði Fabio Capello, landsliðsþjálfari Englands. „Ég talaði við hann eftir leik á sunnudagskvöld til að sýna honum stuðning, það sama gerði aðstoðarmaður minn Franco Baldini."

„David er frábær atvinnumaður og var búinn að leggja hart að sér til að verða tilbúinn fyrir HM. Það er því mikið áfall fyrir hann að missa af mótinu. Ég finn mikið til með honum."