Ósammála VG varðandi sjúkrahús Róberts

„Innan Vinstri grænna hefur verið nokkur andstaða við þessa framkvæmd og þá á forsendum þess að um einkavæðingu í heilbrigðisþjónustu sé að ræða. Þessu er ég ósammála því uppbygging að Ásbrú er ekki einkavæðing enda þjónustar sjúkrahúsið erlenda sjúklinga og enginn kostnaður mun falla á Íslendinga," segir Magnús Orri Schram, þingmaður Samfylkingarinnar og varaformaður viðskiptanefndar.

Félag í eigu Róberts Wessman hyggst leigja gamla hersjúkrahúsið að Ásbrú í Keflavík undir einkasjúkrahús fyrir útlendinga. Ögmundur Jónasson, þingmaður VG, og Álfheiður Ingadóttir, heilbrigðisráðherra eru meðal þeirra sem hafa gagnrýnt hugmyndirnar.

Magnús Orri segir í pistli á Pressunni að helsta verkefni stjórnmálamanna sé að vinna á atvinnuleysi á Íslandi í dag. „Uppbygging einkasjúkrahúss að Ásbrú krefst 100 milljón króna framlags ríkisins en skapar 300 störf, eykur veltu þjónustuaðila og hefur fjölmörg önnur jákvæð áhrif á samfélagið á Reykjanesi. Sem dæmi um ávinning þá kostar það ríkið 500 milljónir króna að hafa 300 manns á atvinnuleysisskrá."

Magnús segist ekki ætla að standa í vegi fyrir þessari atvinnuuppbyggingu. „Það væri óskandi ef fleiri frumkvöðlar kæmu til ríkisins og gætu skapað 300 sjálfbær störf með 100 milljón króna stuðningi frá hinu opinbera, sem fljótir verða að skila sér margfalt til baka."