Þorkell semur við sjálfan sig um leigugreiðslur HR

Eins og fréttastofa greindi frá í gærkvöldi er Háskólinn í Reykjavík nálægt samkomulagi við Fasteign hf. um 40 prósent afslátt af þúsund milljóna króna leigu á nýju skólabyggingunni í Öskjuhlíð. Jafnframt mun Eignarhaldsfélagið Fasteign hf. stofna sérstakt dótturfélag til að halda utan um skólabyggingu HR og hafa áform þess efnis verið samþykkt af bankaráði Íslandsbanka, en bankinn er stærsti hluthafinn í Fasteign hf.

Samkomulag milli HR og Fasteignar hf. er ekki í höfn, en það ætti varla að vera mjög erfitt að færa rök fyrir ágæti þess í stjórn Fasteignar hf. því fjármálastjóri HR, Þorkell Sigurlaugsson, situr í stjórn félagsins. Hann verður því í þeirri stöðu að semja við sjálfan sig.

Mikið hefur verið rætt um erfiða fjárhagsstöðu HR, en skólinn þarf nú að greiða ríflega 20 prósent tekna sinna í leigu vegna nýja hússins, eða um 600 milljónir króna á ári ef samkomulag um afslátt verður að veruleika. Jafnframt hefur skólinn laðað til sín hæfa kennara með því að greiða hærri laun en Háskóli Íslands og því er rekstrarkostnaður nokkuð ár. Þorkell Sigurlaugsson kannaðist ekki við erfiða fjárhagsstöðu skólans í samtali við fréttastofu í gærkvöldi og sagði reksturinn jákvæðan og fjárhagsstöðuna almennt góða.

Samkomulag sem Fasteign hf. og Háskólinn í Reykjavík gerðu vegna hinnar nýju skólabyggingar felst í því að helmingurinn af leiguverðinu var tengdur við gengi evru, því hækkuðu leigugreiðslurnar mikið miðað við upphaflegrar áætlanir þar sem byggingarkostnaður varð talsvert hærri í kjölfar gengisfalls krónunnar.

Vegna hækkunarinnar hefðu leigugreiðslur HR átt að vera þúsund milljónir króna á þessu ári, sem skólinn gat engan veginn ráðið við.