Freyr aðstoðar Kristján - Gunnar tekur við kvennaliðinu

Freyr Alexandersson mun láta af starfi þjálfara meistaraflokks kvenna hjá Val um mánaðarmótin. Hann verður samt áfram á Hlíðarenda því hann hefur verið ráðinn aðstoðarþjálfari Kristjáns Guðmundssonar sem var ráðinn sem þjálfari karlaliðsins í gær.

Valur hefur ráðið Gunnar Borgþórsson sem þjálfara kvennaliðsins í stað Freys. Gunnar er yfirþjálfari yngri flokka hjá Selfossi og umsjónarmaður knattspyrnuakademíu Íslands á Selfossi.

Freyr mun ekki alveg sleppa takinu af stelpunum því hann er tæknilegur ráðgjafi meistaraflokks kvenna. Hann og Kristján munu síðan koma að stefnumótun hjá 2. og 3. flokki karla og kvenna hjá félaginu.