Schengen-aðild betri en að standa utan samstarfsins

Ísland hefur frá 1996 greitt tæpan milljarð króna fyrir þátttöku í Schengen-samstarfinu. Um er að ræða greiðslur til stofnana Evrópusambandsins auk kostnaðar sem sérstaklega er stofnað til hér á landi.

Þetta er meðal þess sem kemur fram í svari Rögnu Árnadóttur, dómsmála- og mannréttindaráðherra, við fyrirspurn Sigurðar Inga Jóhannssonar, þingmanns Framsóknarflokksins, um Schengen-samstarfið.

Sigurður spurði meðal annars um mat ráðherra á ávinningi samstarfsins. Leggur Ragna áherslu á að frjáls för fólks grundvallist á EES-samningnum en ekki Schengen-samstarfinu. Bendir hún líka á að þrátt fyrir að persónueftirlit hafi verið afnumið á innri landamærum Schengen-svæðisins komi það ekki í veg fyrir að lögregla geti framkvæmt slíkt eftirlit. Í svarinu er bent á mikilvægi aðildar að Schengen-upplýsingakerfinu sem talið sé eitt mikilvægasta tæki til lögreglusamvinnu innan Evrópu.

Fram kemur að afnám landamæraeftirlits á innri landamærum geti gert afbrotamönnum hægara um vik við undankomu til annarra ríkja.

Endurkomubann og farbann séu haldlítil þegar í hlut eigi brotamenn sem staddir eru innan svæðisins og eru staðráðnir í að koma aftur til landsins. Segir dómsmála- og mannréttindaráðherra að landamæraeftirlit myndi vissulega auka möguleika íslenskra yfirvalda til að framfylgja endurkomubanni. Á hinn bóginn myndi slíkt landamæraeftirlit engu breyta um að íslensk yfirvöld stæðu berskjölduð gagnvart margfalt stærri hópi erlendra glæpamanna sem hér gæti hlaupið í skjól frá handtökuskipunum sem skráðar séu í upplýsingakerfi Schengen.

Líkt og áður sagði hefur Ísland varið tæpum milljarði króna til Schengen-samstarfsins. Gerir ráðherra ráð fyrir að eftirleiðis verði kostnaðurinn um 150 milljónir króna á ári, að meðaltali. Er talið að svipaður kostnaður yrði við upptöku landamæraeftirlits með öllum farþegum á leið til Íslands frá Evrópu.bjorn@frettabladid.is