Ragnheiður Elín: Ögmundur reynir að koma í veg fyrir atvinnusköpun

Þróunarfélag Keflavíkurflugvallar, sem er að fullu í eigu ríkisins, ætlar að leggja 100 milljónir til endurbóta á gamla hersjúkrahúsinu að Ásbrú.

Félag í eigu Róberts Wessman hyggst síðan leigja aðstöðuna undir einkasjúkrahús fyrir útlendinga. Ögmundur Jónasson, þingmaður Vinstri grænna, sagði í fréttum Stöðvar 2 í gær að þegar peningar sem ættaðir eru úr vösum skattgreiðenda eru notaðir til að fjármagna einkasjúkrahús vakni ýmsar spurningar sem krefjist svara.

Ragnheiður Elín Árnadóttir, þingmaður Sjálfstæðisflokksins, segir í samtali við fréttastofu að ummæli Ögmundar lýsi grundvallarmisskilningi á því uppbyggingarstarfi sem fari fram á gamla varnarsvæðinu. Þróunarfélagið hafi verið stofnað sérstaklega til að nýta byggingarnar á svæðinu.

„Þessar hundrað milljónir sem Þróunarfélagið er að leggja í uppbyggingu gamla herspítalans eru ekki skattfé í þeim skilningi að það verði þá tekið og sett inn í heilbrigðiskerfið annars staðar, ef þetta verkefni fellur um sjálft sig. Þær yrðu þá notaðar í annað uppbyggingarstarf upp á velli," segir þingmaðurinn.

Ragnheiður Elín segir að málið snúist fyrst og fremst um að koma byggingunum á svæðinu og starfsemi í gang. „Það er með ólíkindum að Ögmundur Jónasson, þingmaður, sé eina ferðina enn að reyna að leggja stein í götu þeirra sem vilja skapa atvinnutækifæri á Suðurnesjum," segir Ragnheiður Elín.