West Ham gæti selt Upson

David Gold, annar eigandi West Ham, viðurkennir að svo geti farið að félagið neyðist til þess að selja varnarmanninn Matthew Upson frá félaginu.

Samningur Upson við félagið rennur út næsta sumar og West Ham vill ekki hætta á að missa hann án greiðslu.

"Við viljum halda Matt hjá félaginu en við vitum að við verðum að selja ef hann vill ekki vera áfram hjá okkur. Þetta er því snúin staða sem við verðum að bregðast við. Ef eitthvað lið myndi bjóða 6-7 milljónir punda í hann núna þá myndum við selja," sagði Gold.

West Ham er þrátt fyrir það að vinna í að fá leikmanninn til þess að framlengja. Það virðist ganga hægt.