Ireland: Var farinn að lemja hausnum í vegginn

Miðjumaðurinn Stephen Ireland er kominn til Aston Villa en þangað var hann sendur eftir að hafa verið notaður sem skiptimynd upp í kaup Man. City á James Milner.

Ireland átti ekki upp á pallborðið hjá Roberto Mancini, stjóra Man. City.

"Mér fannst ég ekki vera velkominn hjá Man. City. Ég var farinn að lemja hausnum ítrekað í vegginn. Það var alveg sama hvað ég gerði á æfingum, það breytti engu máli," sagði Ireland svekktur.

"Sú staða sem ég lenti í hjá City á eftir að koma oft upp hjá félaginu enda margar stórstjörnur komnar í hópinn. Ég er enn ungur og vonandi á Villa eftir að ná því besta úr mér. Ég hef lagt félagaskiptin til hliðar og bíð nú spenntur eftir því að byrja tímabilið."