Gallas í læknisskoðun hjá Tottenham

William Gallas verður orðinn leikmaður Tottenham seinna í dag standist hann læknisskoðun á White Hart Lane. Hann kemur á frjálsri sölu.

Gallas var fyrirliði Arsenal um tíma en fékk ekki nýjan samning þar í sumar.

Hann er 33 ára gamall og mun koma með aukna reynslu í vörn Tottenham sem leit ekki vel út gegn Young Boys í Meistaradeildinni. Þá eru meiðslapésarnir Ledley King og Jonathan Woodgate aldrei öruggir um að haldast heilir.

Gallas verður aðeins sjötti leikmaðurinn til að fara á milli þessara miklu erkifjenda í fótboltanum. Hinir eru David Bentley, Rohan Ricketts, David Jenkins, Laurie Brown og Jimmy Brain.