Búist við 15 þúsund manns á leikinn í kvöld

Búist er við að um fimmtán þúsund áhorfendur verði á leik Skotlands og Íslands á Easter Road í Edinborg í kvöld.

Easter Road er heimavöllur skoska úrvalsdeildarfélagsins Hibernian og tekur 20.400 áhorfendur í sæti.

Samkvæmt upplýsingum frá KSÍ í gærkvöldi var von á fimmtán þúsund áhorfendum.

Billy Stark, þjálfari skoska liðsins, hvetur í skoskum fjölmiðlum í dag íbúa Edinborgar til að fjölmenna á völlinn og styðja strákana sína.

"Ég bind vonir við að áhorfendir verði líflegir og láti vel í sér heyra. Það er mín reynsla að það geti hjálpað leikmönnum mikið, sérstaklega þegar á reynir og menn verða þreyttir," sagði Stark.

Ísland vann fyrri viðureign liðanna, 2-1, en sigurvegari rimmunnar kemst í úrslitakeppni EM í flokki U-21 landsliða.