Bráðabirgðastæði á Stjörnuvellinum um helgina

Stjörnumenn ætla sér að koma upp bráðabirgðastæðum fyrir leik liðsins gegn Breiðabliki í lokaumferð Pepsi-deildar karla um helgina. Þetta kom fram í hádegisfréttum Bylgjunnar.

Blikar geta með sigri í leiknum tryggt sér Íslandsmeistaratitilinn og því mikill áhugi á leiknum.

Stúkan á Stjörnuvellinum tekur um 1200 manns í sæti og á Almarr Guðmundsson, formaður knattspyrnudeildar Stjörnunnar, von á því að hægt verði að koma fyrir aðstöðu fyrir þúsund áhorfendur til viðbótar.

Stjörnuvöllurinn er lagður gervigrasi sem hefur verið gagnrýnt nokkuð í sumar og þótt lélegt. Almarr segir að sú gagnrýni sé að mörgu leyti réttmæt og það sé vilji deildarinnar að setja náttúrulegt gras á völlinn innan 2-3 ára. Í millitíðinni yrði þó lagt nýtt gervigras á völlinn.

Það eru þó bæjaryfirvöld í Garðabæ sem eiga lokaorðið í þessu máli. Ef svo færi að Stjörnuvöllur yrði að hefðbundnum grasvelli þyrfti að finna lausn á æfingaaðstöðu félagsins þar sem ekki er yfirbyggður knattspyrnuvöllur í Garðabæ nú.