Gunnleifur: Við gerðum bara ekki nógu vel á þessu tímabili

Gunnleifur Gunnleifsson, markvörður FH, átti góðan leik í 3-0 sigri á Fram á Laugardalsvellinum í dag og FH-ingar geta þakkað honum fyrir að Framarar skoruðu ekki á þá í leiknum. Gunnleifur var þó eins og aðrir FH-ingar hálf niðurlútur í leikslok þrátt fyrir sigurinn.

„Í ljósi úrslita annarsstaðar þá er þetta auðvitað svekkelsi en við gerðum allt sem við gátum til þess að vinna titilinn. Við unnum einhverja sex leiki í röð en það bara dugði ekki til," sagði Gunnleifur.

„Það er ýmislegt sem gerist hjá okkur í sumar en þetta er bara svona í fótboltanum, stundum vinnur maður og stundum tapar maður. Við gerðum bara ekki nógu vel á þessu tímabili," sagði Gunnleifur.

„Við unnum titil en við hefðum viljað vinna tvöfalt. Svoleiðis á það að vera í FH því FH vill vinna alla titla sem eru í boði. Það eru vonbrigði núna strax eftir leikinn en þegar við lítum yfir tímabilið þá getum við verið sæmilega sáttir með það," sagði Gunnleifur sem bjargaði nokkrum sinnum frá leikmönnum Fram í góðum færum.

„Ég þurfti að vera vakandi og að skila mínu í leiknum. Þetta var tiltölulega öruggur sigur fannst mér. Við vorum kannski heldur aftarlega á vellinum en 3-0 segir sína sögu. Það var planið að liggja aðeins til baka í seinni hálfleik og beita skyndisóknum. Við fengum mörk upp úr því og mér fannst þetta ekki vera í hættu," sagði Gunnleifur en FH liðið fór mjög aftarlega á völlinn í seinni hálfleik.

„Við reyndum að verja stöðuna 1-0 eins og við gátum best. Við ætluðum að bæta við mörkum úr skyndisóknum því við vildum ekki fá okkur mark með því að ana að einhverju," sagði Gunnleifur.