Aðeins þrjú ný nöfn á Íslandsbikarinn á síðustu 45 árum

Það hafa aðeins þrjú ný félög bæst í hóp Íslandsmeistara í knattspyrnu karla á síðustu 45 árum eða síðan að Keflvíkingar unnu sinn fyrsta Íslandsmeistaratitil sumarið 1964. Blikar geta bæst í þann hóp vinni þeir Stjörnuna í Garðabænum í dag og takist það verður Breiðablik tíunda félagið til að eignast Íslandsmeistaratitil í meistaraflokki karla.

FH-ingar voru síðasta félagið til að bætast í hóp Íslandsmeistarafélaga þegar þeir tryggðu sér fyrsta titilinn sinn á Akureyrarvelli 19. september 2004. FH vann 2-1 sigur á KA í lokaumferðinni þökk sé sigurmarki frá Ásgeiri Gunnari Ásgeirssyni. FH-ingar hafa unnið fjóra meistaratitla á þeim fimm árum sem eru liðin frá fyrsta titlinum og geta bætt við einum til viðbótar falli hlutirnir með þeim í dag.

KA-menn urðu Íslandsmeistarar í fyrsta og eina skiptið 16. september 1989. KA vann þá 2-0 sigur á Keflavík í Keflavík og varð meistari vegna þess að topplið FH tapaði fyrir Fylki í lokaumferðinni.

ÍBV vann sinn fyrsta Íslandsmeistaratitil fyrir 31 ári síðan þegar þeir unnu 1-0 sigur á Víkingi á Laugardalsvelli 15. september 1979. Þeir fengu síðan hjálp frá KA-mönnum sem náðu 1-1 jafntefli við Valsmenn daginn eftir. Hefðu Valsmenn unnið leikinn þá hefði farið fram aukaleikur um titilinn en í þá daga réði markatalan ekki eins og nú.

Keflvíkingar unnu sinn fyrsta meistaratitil 1964 og fyrstu meistaratitill Skagamanna kom í hús árið 1951 en þá fór Íslandsbikarinn í fyrsta sinn af höfuðborgarsvæðinu en til þess tíma höfðu KR, Fram, Valur og Víkingur unnið alla Íslandsmeistaratitlana.

Félög sem hafa orðið Íslandsmeistarar í meistaraflokki karla:

24 sinnum - KR (Síðast 2003)

20 sinnum - Valur (2007)

18 sinnum - Fram (1990)

18 sinnum - ÍA (2001)

5 sinnum - FH (2009)

5 sinnum - Víkingur R. (1991)

4 sinnum - Keflavík (1973)

3 sinnum - ÍBV (1998)

1 sinni - KA (1989)