Ondo markakóngur: Það er mitt hlutverk að skora

„Ég er fyrst og fremst ánægður með það að hafa haldið okkur í deildinni," sagði Gilles Mbang Ondo eftir tapið gegn Selfyssingum, 5-2, í dag.

Gilles skoraði 2 mörk í leiknum og náði því að verða markakóngur Pepsi-deildar karla árið 2010. Hann skoraði fjórtán mörk á tímabilinu, líkt og Alfreð Finnbogason og Atli Viðar Björnsson, en lék fæsta leiki af þeim þremur. Það dugar til að vinna nafnbótina.

„Ég er framherji svo það er mitt hlutverk að skora mörk," sagði Ondo.

Grindvíkingar léku virkilega illa í dag og því fór sem fór.

„Við vorum alls ekki nógu góðir. Selfyssingar léku virkilega vel og það var erfitt að komast í gegnum vörnina hjá þeim," sagði Ondo.

„Við erum ennþá í deildinni og verðum bara að gleyma þessum leik, taka gott frí og byrja síðan strax að vinna í næsta tímabili," sagði Ondo.

Gilles Mbang Ondo hefur verið leikmaður Grindvíkinga í nokkur ár, en önnur lið hafa sýnt honum áhuga.

„Ég veit ekki alveg hvar ég verð á næsta tímabili. Ég hef áhuga á því að spila erlendis en maður veit aldrei," sagði Gilles Mbang Ondo eftir leikinn í dag.