Aron Einar skoraði í tapleik

Aron Einar Gunnarsson skoraði eina mark Coventry er liðið tapaði, 2-1, fyrir Preston í ensku B-deildinni í dag.

Coventry hefur átt misjöfnu gengi að fagna í upphafi leiktíðar og er í þrettánda sæti deildarinnar með ellefu stig eftir átta leiki.

QPR er hins vegar enn á toppi deildarinnar eftir 3-0 sigur á Doncaster í dag. Heiðar Helguson lék fyrstu 87 mínúturnar í leiknum.

Þá vann Reading 3-0 sigur á Barnsley í dag en hvorki Brynjar Björn Gunnarsson né Ívar Ingimarsson voru í leikmannahópi Reading í dag.

Íslendingar voru einnig í eldlínunni í ensku C-deildinni í dag. Jóhannes Karl Guðjónsson lék allan leikinn þegar að Huddersfield tapaði fyrir Swindon, 1-0, á útivelli.

Kári Árnason lék allan leikinn á miðjunni með Plymouth sem gerði 1-1 jafntefli við Rochdale.

Þá kom Ármann Smári Björnsson ekkert við sögu er Hartlepool vann 2-1 sigur á Walsall.

Huddersfield er í fjórða sæti deildarinnar, Hartlepool í því sextánda og Plymouth sautjánda.