Guðjón Árni: Allt jákvætt við þennan dag

„Við lögðum upp með það í undirbúningi fyrir leikinn að enda þetta á góðum nótum og það tókst," sagði Guðjón Árni Antoníusson, bakvörður Keflvíkinga, eftir að liðið vann 4-1 sigur á ÍBV í lokaumferð Pepsi-deildarinnar.

„Það er auðvitað leiðinlegt fyrir þá að missa af titlinum en svona er þetta bara. Þetta bara small algjörlega hjá okkur núna. Við vissum að þeir þurftu að vinna leikinn og í stöðunni 2-1 opnaðist helling fyrir okkur. Við nýttum okkur það."

Tímabilið hefur verið ansi kaflaskipt hjá Keflvíkingum. „Við byrjuðum ágætlega en svo kom mikill öldudalur sem við áttum erfitt með að rífa okkur upp úr. En í lokin komu nokkrir ljósir punktar og við náðum að ranka við okkur," sagði Guðjón. „Það var allt jákvætt við þennan dag. Við náðum sigri og menn fengu tækifæri."

Yfir tíu leikmenn Keflavíkurliðsins verða samningslausir um áramót og er Guðjón einn af þeim. „Ég er ekki búinn að ákveða mína framtíð en býst við að vera áfram í Keflavík. Ég reikna með því að flestir verði hérna áfram," sagði Guðjón.