Eiður Aron: Þorði ekki að horfa á vítið

„Þetta gerist ekki súrara en þetta. Við stefnum bara á titilinn á næsta ári, það þýðir ekki annað," sagði varnarmaðurinn Eiður Aron Sigurbjörnsson hjá ÍBV eftir að liðið tapaði fyrir Keflavík í dag. Eyjamenn hefðu með sigri orðið Íslandsmeistarar þar sem Blikar gerðu jafntefli í Garðabæ.

„Úrslitin í Garðabænum gera þetta enn súrara. Menn voru greinilega eitthvað yfirspenntir enda mikið í húfi. Við erum ungt lið og höfum aldrei spilað svona stóran leik áður. Við verðum samt að vera sáttir við sumarið."

„Við settum okkur háleit markmið fyrir tímabilið og náðum þeim en þegar maður á möguleika á titlinum er svekkjandi að ná honum ekki."

Á 83. mínútu misnotaði markvörðurinn Albert Sævarsson vítaspyrnu en hann hefði getað jafnað í 2-2 og galopnað leikinn. „Ég horfði ekki á vítið, ég þorði því ekki. En þetta kemur fyrir. Við höfum nokkrum sinnum klúðrað vítum í sumar. Þetta gerist fyrir bestu menn," sagði Eiður.