Ólafur: Þarf að endurskoða margt eftir tímabilið

„Ég get ekki verið sáttur hvernig við endum mótið," sagði Ólafur Örn Bjarnason, þjálfari Grindvíkinga, eftir tapið gegn Selfyssingum í dag en leiknum lauk með 5-2 sigri heimamanna á Selfossi.

„Þegar við fáum á okkur fyrsta markið þá fellur allt spil okkar í sundur og menn fara gera eitthvað allt annað en lagt var upp með. Eftir svona frammistöðu þá sér maður alveg hvað þarf að gera í Grindavík svo hægt sé að stefna á eitthvað annað en botnbaráttu," sagði Ólafur.

Ólafur Örn Bjarnason tók við Grindvíkingum á miðju tímabili en þeir byrjuðu mótið skelfilega og voru í virkilega slæmum málum þegar hann tók við liðinu.

„Strákarnir brugðust virkilega vel við því á sínum tíma þegar ég kom til liðsins en eftir þrjá til fjóra leiki þá fannst mér við spila nokkra leiki sem voru alveg á pari við leikinn í dag. Við verðum bara að vera mjög sáttir við það að halda okkur í deildinni eftir allt saman," sagði Ólafur.

„Þetta snýst mikið um hver sé metnaður manna í Grindavík. Ef það á að stefna eitthvað hærra þá þurfa menn að fara skoða sín mál og við verðum jafnvel að bæta við okkur mannskap. Það á ekki að koma á óvart ef leikmenn fá mikla samkeppni um stöður á næsta ári og þeir verða bara að svara því," sagði Ólafur Örn Bjarnason, þjálfari Grindvíkinga, virkilega svekktur að leikslokum.