Willum áfram með Keflavík: Spennandi tímar framundan

„Ég held að leikmenn hafi haft gaman að því að spila hér í dag," sagði Willum Þór Þórsson, þjálfari Keflavíkur, eftir 4-1 sigurinn gegn ÍBV. Eyjamenn hefðu staðið uppi sem sigurvegarar Íslandsmótsins með sigri.

„Þetta var skemmtilegur leikur og við spiluðum bara vel í dag. Það er margt jákvætt og gaman að sjá ungan strák eins og Arnór Ingva (Traustason) koma sterkan inn. Þetta var fyrsti leikurinn sem hann er í byrjunarliði í efstu deild," sagði Willum en Arnór skoraði í leiknum. „Maður veit að tilfinningin fyrir hann er mögnuð og maður fagnaði með honum."

Fjölmargir leikmenn Keflvíkinga verða samningslausir um áramót. „Við höfum verið að vinna í því og það er mjög mikilvægt að halda þessum hópi saman. Við höfum trú á því að það þurfi ekki mikið til að taka skrefið og blanda okkur í toppbaráttu í deildinni," sagði Willum.

Það er ekkert fararsnið á Willum og verður hann áfram með liðið. „Jájá, það var lagt upp með það. Það eru spennandi tímar hjá Keflavíkurliðinu og eins og við byrjuðum deildina vöknuðu vonir og væntingar. Þess vegna voru vonbrigðin kannski sterkari og við jöfnuðum okkur seint í þetta," sagði Willum.

„Mér fannst umfjöllun fjölmiðla og sérfræðinga um okkar lið oft óvægin. Það er mikil vinna bak við liðið en við lendum í mörgum áföllum. Ómar markvörður meiðist á mikilvægum tímapunkti, Paul McShane meiðist og Jóhann Birnir og Haukur Ingi sem áttu að koma inn í liðið úr meiðslum þeir komu aldrei. Svo meiddist Andri Steinn einnig. Það voru því fimm sterkir leikmenn sem við náðum ekki að vinna með gegnum mótið. Ég efast um að nokkuð lið myndi ekki láta á sjá við þær aðstæður."