Formaður Stoke: Dæmt með stóru liðunum

Peter Coates, stjórnarformaður Stoke, segir að það halli á sitt lið í dómgæslunni. Hann er allskostar ekki sáttur við dómgæslu Alan Wiley í 1-1 jafnteflinu gegn Manchester City á þriðjudag.

Ryan Shawcross skoraði mark undir lok leiksins sem hefði átt að standa en dómarinn dæmdi ranglega aukaspyrnu.

„Dómararnir hafa tilhneygingu til að dæma með stóru liðunum, öll vafa-atriði falla þeim í vil," sagði Coates í samtali við staðarblaðið í Stoke, The Sentinel.

Stoke hefur þann stimpil á sér að vera hart í horn að taka og gæti það haft áhrif á dómgæsluna í garð liðsins að mati Coates. „Það ætti ekki að vera þannig, en gæti verið það. Það er erfitt að segja."