Unnið að lausn tannréttingadeilu

Kristín Heimisdóttir, formaður Tannréttingafélags Íslands, er bjartsýn á að deilur tannréttingasérfræðinga og yfirvalda leysist á næstunni. Kristín segir tannréttingasérfræðinga hafi lagt til lausn sem liggi á borði ráðherra. Fulltrúar tannréttingalækna munu funda með starfsmönnum heilbrigðisráðuneytis næsta mánudag.

Deilan veldur því að enginn sem byrjað hefur í tannréttingum á þessu ári hefur fengið endurgreitt frá ríkinu. Tannréttingalæknar hafa ekki viljað samþykkja beiðnir sjúklinga um endurgreiðslu vegna þess að með því að undirrita nýtt eyðublað um slíka beiðni hefðu þeir jafnframt verið að samþykkja nýja reglugerð sem þeir eru afar ósáttir við.

Í henni er meðal annars kveðið á um að það sé í höndum Sjúkratrygginga Íslands að ákveða hvort tannréttingar séu læknisfræðilega nauðsynlegar, og þar með hvort sjúklingar fái endurgreiðslu. Kristín segir ómögulegt að ætla embættismönnum Sjúkratrygginga ríkisins að meta hvort tannrétting sé nauðsynleg, til þess þurfi sérfræðing í tannréttingum. Að sögn Kristínar kostar hefðbundin tannrétting á bilinu 700 til 1.100 þúsund að meðaltali. Hingað til hefur ríkið greitt 150.000 af upphæðinni. - sbt