Íslendingur á Hawaii: Búist við flóðbylgju í kvöld

„Ég vaknaði við sírenur um klukkan sex í morgun og ég vissi strax að þetta var ekki æfing því þær eru alltaf fyrsta miðvikudag í hverjum mánuði," segir Ásdís Benediktsdóttir sem býr á Hawaii. Búist er við að fimm metra há fljóðbylgja skelli á eyjarnar milli klukkan níu og tíu í kvöld að íslenskum tíma.

Flóðbylgjuviðvörun hefur verið gefin út fyrir Hawaii, Ástralíu, Nýja Sjáland, Mið-Ameríku og Kyrrahafseyjar eftir að geysiöflugur jarðskjálfti reið yfir Chile í morgun. Á Páskaeyju hafa íbúar verið fluttir frá ströndinni og upp í hæðir.

„Það er búist við því að ölduhæðin verði allt að þrír metrar. Fólk sem býr við sjóinn hefur verið beðið um að færa sig," segir Ásdís. Erlendir miðlar segja aftur á móti að ölduhæðin verði líklega fimm metra há.

Ásdís hefur búið á Hawaii síðan 2007. Hún er í doktorsnámi í jarðeðlisfræði á eyjunni Oahu. Höfuðborgin Honolulu er á eyjunni.

Ásdís heldur að hún þurfi ekki að færa sig þar sem hún býr ekki nálægt sjónum. Hún segir að fólk sé almennt rólegt en fylgist vel með fréttum. „Maður hlustar á útvarpið og fær nýjustu upplýsingar."