Hugfanginn af einkabílnúmerum - myndir

Egill Ólafsson, tvítugur nemi við MS, byrjaði undir lok apríl að safna myndum af íslenskum einkabílnúmerum sem urðu á vegi hans í myndaalbúm á Facebook. Myndirnar eru nú orðnar 140 talsins og bætist stöðugt við.

„Ég er bílaáhugamaður og hefur alltaf langað að fá mér einkanúmer," segir Egill um tilkomu myndasafnsins. „Það hefur verið draumurinn að fá sér flottan kagga með eitthvað flott einkanúmer, það er kveikjan að þessu. Svo ég fór að safna þessu, finna það flottasta og kveikja hugmyndir."

Á myndunum kennir ýmissa grasa, allt frá auglýsingaslagorðum til ofurhetja. Sum einkanúmerin vísa augljóslega til bifreiðarinnar sem númerið ber en önnur vísa hugsanlega til ökumannsins sjálfs.

Uppáhaldsnúmer Egils er IH82CU, eða „I hate to see you". Númerið er skrifað með hálfgerðu dulmáli, en það eru fleiri sem velja óræð skilaboð á bílinn sinn. Einn hefur kannski ætlað að vera óháður og endað sem HÁÓÐUR, og HÁST1 hefur líklegast verið með of langt nafn fyrir númeraplötuna.

Hjá umferðarstofu kostar alls 30.700 krónur að fá einkanúmer á bílinn sinn, en sumum finnst það þess virði að senda öðrum ökumönnum í umferðinni skilaboð. Sumir heilsa, þeir hraðskreiðustu kveðja og aðrir minna ökumenn einfaldlega á að taka því rólega og brosa.