Pulis vill að dómarar geti fallið um deild

Tony Pulis, stjóri Stoke, er allt annað en ánægður með dómgæsluna í ensku úrvalsdeildinni en um helgina var umdeilt atvik í leik liðsins gegn Sunderland.

Kenwyne Jones átti þá skalla að marki en Lee Cattermole virtist handleika knöttinn þegar hann bjargaði á marklínu. Margir vildu meina að boltinn hafi meira að segja verið kominn inn fyrir línuna.

Tony Pulis sagði eftir leikinn þetta aðeins vera eitt af mörgum atvikum á leiktíðinni sem sýnir hversu slök dómgæslan hefur verið.

Hann telur einnig að litlu félögin í ensku úrvalsdeildini fái oftar að kenna á slæmri dómgæslu en stærri félögin. Hann vill taka upp kerfi þar sem dómarar geti fallið um deild, rétt eins og liðin sjálf.

„Það getur bara ekki verið rétt að þessi mistök gerist hvað eftir annað án þess að nokkuð sé gert í því," sagði Pulis en Stoke er nú á þriðja ári sínu í ensku úrvalsdeildinni.

„Svona hefur þetta verið líka fyrstu tvö árin. Við höfum mátt sætta okkur við hræðilega dómgæslu. Það kemur að því að maður verður að standa upp og segja að þetta sé einfaldlega rangt."

„Ég hef íhugað þetta vandlega um helgina og tel að það ætti að koma á kerfi þar sem hvert félag í ensku úrvalsdeildinni geti greitt dómurum atkvæði í lok leiktíðar. Þeir þrír dómarar sem koma verst út úr kosningunni ættu að falla úr ensku úrvalsdeildinni og þeir þrír bestu í B-deildinni ættu að koma upp í þeirra stað," sagði Pulis.