Erfitt fyrir Breta og Hollendinga að hafna tilboði Íslendinga

Engin fundur hefur verið boðaður milli samninganefndar Íslands og Breta og Hollendinga í dag. Gert er hins vegar ráð fyrir frekari viðræðum á næstu dögum. Formaður Framsóknarflokksins segir að erfitt verði fyrir Breta og Hollendinga að hafna tilboði Íslendinga.

Íslenska samninganefndin fundaði með Bretum og Hollendingum á mánudag og í gær. Tilgangurinn er að sannfæra Breta og Hollendinga um að hefja að nýju samningaviðræður um Icesave.

Ekki hefur verið boðað til fundar í dag en samkvæmt upplýsingum frá fjármálaráðuneytinu er gert ráð fyrir frekari fundarhöldum síðar í þessari viku.

Ekki liggur fyrir hvort Bretar og Hollendingar séu tilbúnir til nýrra viðræðna en mikil leynd hvílir yfir fundunum. Sigmundur Davíð Gunnlaugsson, formaður Framsóknarflokks, segist vera hóflega bjartsýnn.

„Við erum búin að bjóða þeim mjög sanngjarna lausn og ef að þeir fallast ekki á hana þá er ekki allt með felldu í þessu. En í ljósi þess hversu sanngjörn lausnin sem boðið upp á er þá ættu þeir að geta fallist á hana," segir Sigmundur.

Hann vill ekki gefa upp hvað felst í íslensku tillögunni. „Ég held að það borgi sig ekki á meðan á viðræður standa yfir. Við skulum gefa samninganefndinni frið til þess að ræða þetta í rólegheitum. Það hefur nefnilega verið mjög skaðlegt það sem hefur birst í greinum að undanförnu frá talsmönnum ríkisstjórnarinnar og í rauninni alveg óskiljanlegt að menn skuli halda áfram að skrifa slíkt á þessum tímapunkti," segir Sigmundur.