Wright-Phillips ætlar ekki að gefast upp

Shaun Wright-Phillips er ekkert á því að gefast upp hjá Man. City þó svo baráttan um sæti í liðinu sé gríðarlega hörð.

Einhverjir leikmenn munu gefast upp og nú þegar hafa Emmanuel Adebayor og Shay Given gefið til kynna að þeir vilji yfirgefa félagið og fara eitthvert þar sem þeir fá að spila.

Wright-Phillips á rétt eins og þeir erfitt uppdráttar hjá City og hefur ekki fengið mörg tækifæri.

"Ég trúi ekki á að gefast upp. Ég hef alltaf viljað vera hérna og sé enga ástæðu til þess að fara. Félagið vill líka halda mér og áskorunin liggur í því að hjálpa félaginu að ná markmiðum sínum," sagði vængmaðurinn.

"Ég hugsa ekki einu sinni um að vera á bekknum. Ég hugsa um að skila mínu þegar ég fæ tækifæri til þess. Ég er mjög spenntur fyrir því að fá þessa leikmenn til félagsins. Við munum læra af hvor öðrum og það er fínn andi í liðinu."