Var með 12 þúsund krónur í mánaðarlaun

Brasilíumaðurinn Ramires er klár í baráttuna hjá Chelsea en þessi harðduglegi 23 ára miðjumaður þekkir ekkert annað en að hafa verulega fyrir hlutunum í lífinu.

"Ég er tilbúinn að leggja hart að mér. Ég á mér enga uppáhaldsstöðu. Ég er vanur að spila á miðri miðjunni en mun spila þá stöðu sem ég er beðinn um að spila án þess að kvarta," sagði Ramires við fjölmiðla þegar hann var kynntur til leiks.

Þegar þessi strákur var 16 og 17 ára þá vann hann í erfiðri byggingarvinnu samhliða fótboltanum. Þar fékk hann greitt rúmar 12 þúsund krónur á mánuði.

"Það er eðlilegt í Brasilíu að hjálpa fjölskyldunni. Þessi erfiða vinna á lúsarlaunum hefur mótað minn karakter."

Ramires hefur alltaf verið fljótur að aðlagast og þykir hafa ótrúlegt þol.

"Í Brasilíu var ég oft kallaður blái Kenýubúinn," sagði Ramires og hló. "Þegar ég fór til Benfica var ég rauði Kenýubúinn en er aftur orðinn blár núna."