Dyrnar enn opnar fyrir Beckham

Fabio Capello, landsliðsþjálfari Englands, neitar því að vera búinn að útiloka David Beckham frá enska landsliðinu.

Ítalinn sagði nokkuð skýrum orðum á blaðamannafundi eftir HM að Beckham hefði væntanlega leikið sinn síðasta landsleik. Fyrir það var hann mikið gagnrýndur.

Capello segir að það sé ekki alveg rétt.

"Ég er búinn að tala við David í símann og útskýrt fyrir honum hvað raunverulega gerðist. Samband okkar er mjög gott. Ég er ekki vanur að tala við menn í síma og þetta er í rauninni í fyrsta skipti sem ég geri það," sagði landsliðsþjálfarinn.

"Beckham þarf að byrja að spila aftur áður en hann kemur til greina í landsliðið. Dyrnar eru opnar fyrir alla leikmenn en auðvitað erum við samt meira að hugsa um ungu leikmennina. Það er samt ekki búið að útiloka neinn leikmann."