Newcastle valtaði yfir Villa – Carroll með þrennu

Nýliðar Newcastle voru í banastuði í ensku úrvalsdeildinni og rúlluðu yfir Aston Villa, 6-0 á St. James' Park í dag. Joey Barton kom heimamönnum yfir með þrumufleyg á 12. mínútu en skömmu áður hafði John Carew brennt illa af úr vítaspyrnu.

Leikmenn Newcastle létu kné fylgja kviði og bættu við fimm mörkum áður en leikurinn var allur. Andy Carroll skoraði þrennu fyrir þá röndóttu og Kevin Nolan tvö mörk en Aston Villa sá aldrei til sólar í leiknum og léku afleitlega.

Joey Barton skartaði myndarlegu yfirvaraskeggi í leiknum en hann hafði gefið það út fyrir tímabilið að hann myndi raka skeggið þegar fyrsti sigurinn væri kominn í hús. Sem betur fer fyrir áhugamenn um enska knattspyrnu vann Newcastle í dag.