Varað við kraftaverkalausn

Varað er við kraftaverkalausninni MMS (e. Miracle Mineral Solution) sem ætlað er að lækna marga sjúkdóma allt frá alnæmi til berkla. Lausnin getur valdið alvarlegum veikindum og jafnvel dauða. Það eru sóttvarnalæknir, Lyfjastofnun, Matvælastofnun, Umhverfisstofnun og Eitrunarmiðstöð Landspítalans sem vara við efninu.

Eitrunarmiðstöð Landspítalans hefur vakið athygli á því að hægt er að kaupa kraftaverkalausnina á netinu. Hún er einnig kölluð kraftaverkaefni (e. Miracle Mineral Supplement).

Í þessari lausn er 28% natríum klórít sem er ætlað að lækna marga sjúkdóma, allt frá alnæmi til berkla. Engin vísindaleg gögn liggja fyrir sem styðja notkun þessarar lausnar við sjúkdómum. Natríum klórít er eitur sem valdið getur metrauðablæði, skemmdum á rauðum blóðkornum og nýrnabilun.

Eindregið er varað við notkun þessarar kraftaverkalausnar. Mikilvægt er að tilfelli þar sem grunur leikur á eitrun af völdum kraftaverkalausnarinnar séu tilkynnt til yfirvalda.