Söfnunin fyrir Ragnar Emil gengur afar vel

Fjölskylda Ragnars Emilssonar, sem er þriggja ára gamall og á við erfiðan hrörnurnarsjúkdóm að stríða, á ekki orð til að lýsa viðbrögðum við söfnun sem nú stendur yfir í Hafnarfirði. Meira en ein og hálf milljón hefur þegar safnast sem gerir það verkum að lífsgæði Ragnars aukast til muna.

Ragnar Emil er með sjaldgæfan og afar alvarlegan hrörnunarsjúkdóm sem heitir, SMA-1. Ragnar er bundinn við hjólastól og öndunarvél þrátt fyrir að vera aðeins þriggja ára. Hver einasta andardráttur er afrek hjá Ragnari sem er þegar orðinn elstur allra barna með þennan sjúkdóm á Íslandi. Lífslíkurnar eru það litlar.

Meira en 50 sjálfboðaliðar taka þátt í söfnuninni fyrir Ragnar og þeir fóru um Hafnarfjörðinn í dag og seldu barmmerki. Sá sem seldi hvað mest var tónlistarmaðurinn Haffi Haff.

Einn af prímusmótorunum í þessari söfnun er 16 ára gamall frændi Ragnars. Öflugur ungur maður sem sat sveittur við að skipueggja starf sjálfboðaliðanna þegar fréttastofa náði tali af honum.

„Það er ótrúlegt hvað margir eru búnir að taka vel í þetta og barmmerkin rjúka út. Við erum einnig með styrktarreikning og þar hefur hellingur safnast," segir Gunnar Sigurjónsson, frændi Ragnars Emils.

Seinnipartinn í dag var meiri en ein og hálf milljón komin í söfnunarkassann sem fara í að bæta aðgengið í og við heimili Ragnars svo hann getir farið þar um á hjólastólnum sínum.

Söfnunarreikningurinn: 140-05-015497 og kennitalan er 250607-2880.