Steingrímur var kominn á fætur

Vakningalest samtakanna Nýs Íslands, á sex eða sjö bílum, mætti klukkan níu í morgun að heimili Steingríms J. Sigfússonar, fjármálaráðherra, í Seljahverfi í Breiðholti í því skyni að vekja hann upp. Steingrímur var hins vegar vaknaður og kom til dyranna fullklæddur enda sagðist hann vera á leiðinni norður í land.

Að sögn Lúðvíks Lúðvíkssonar, sem fer fyrir vakningalestinni, tók Steingrímur vel á móti hópnum en lýsti þó þeirri skoðun sinni að hann teldi full langt gengið með svona aðgerðum bæði gagnvart fjölskyldu sinni og nágrönnum. Lúðvík kvaðst hafa svarað á móti að ríkisbankinn Landsbankinn gengur ekki síður nærri fjölskyldum þessa lands.

Vakningalestin fór síðan heim til Jóhönnu Sigurðardóttur í því skyni að vekja hana en þar kom enginn til dyra.