Svínaflensufárið hneyksli aldarinnar

Evrópuráðið hefur boðað til neyðarfundar síðar í þessum mánuði til þess að ræða um ferli svínaflensunnar og hvernig staðið var að vörnum gegn henni.

Wolfgagn Wodarg yfirmaður heilbrigðismála hjá ráðinu segir að lyfjafyrirtæki hafi ýtt undir ótta almennings við flensuna til þess að fá ríkisstjórnir til þess að verja milljörðum dollara í varnir gegn pest sem hafi svo reynst einkar væg og hættulítil.

Lyfjafyrirtækin hafi meðal annars laumað sínum mönnum inn í Alþjóða heilbrigðisstofnunina og aðrar mikilvægar stofnanir til þess að ná sínu fram.

Wodarg nefnir engin nöfn en Breska blaðið Daily Mail minnir á að á síðasta ári hafi það upplýst að Sir Roy Anderson, vísindamaður sem er ráðgjafi bresku ríkisstjórnarinnar um svínaflensu fái 116 þúsund sterlingspund á ári fyrir stjórnarsetu í GlaxiSmithKline.

Það fyrirtæki er meðal þeirra sem mest munu græða á lyfjaframleiðslu vegna flensunnar.

GlaxoSmithKline vísar ásökunum Wodargs á bug. Og David Salisbury prófessor, sem stýrir bólusetningum í Bretlandi segir að ekki sé fótur fyrir orðum hans.

Hagsmunaðilum hafi verið haldið utan við ákvarðaðanatökum.