Samkeppni um SMS-lánin

Að minnsta kosti tvö fyrirtæki bjóða nú upp á svokölluð SMS-lán hér á landi, og fleiri hyggjast hasla sér völl á þessum markaði. Fyrirtækið Hraðpeningar tók til starfa í vikunni, en fyrir var smálánafyrirtækið Kredia.

Hin svokölluðu SMS-lán hafa verið harðlega gagnrýnd, bæði hér á landi og annars staðar á Norðurlöndum. Neytendasamtökunum hafa borist kvartanir frá neytendum sem hafa tekið slík lán. Lánin hafa verið gagnrýnd fyrir að auðvelda ungu fólki að steypa sér í skuldir. Á vef Hraðpeninga er greiðsla á skólagjöldum nefnt sem dæmi um skynsamlega notkun á smáláni.

Bæði fyrirtækin bjóða lán allt að 40 þúsundum króna í fimmtán daga. Bæði bjóða aðeins 10 þúsund króna lán í fyrsta skipti sem lán er tekið, en upphæðin hækkar um 10 þúsund krónur í hvert skipti og getur orðið 40 þúsund krónur í fjórða skiptið.

Kostnaður við lántökuna er sá sami hjá báðum fyrirtækjum. Fyrir 10 þúsund króna lán í fimmtán daga þarf að greiða 2.500 krónur í kostnað, og fyrir 40 þúsund króna lán er kostnaðurinn 9.250 krónur. Sé kostnaðurinn reiknaður á ársgrundvelli jafngildir kostnaður af 10 þúsund króna láni 600 prósenta ársvöxtum.

- bj