Kristján Gauti og Ingólfur á skotskónum með Liverpool og Arsenal

Knattspyrnumennirnir efnilegu, Kristján Gauti Emilsson og Ingólfur Sigurðsson, voru báðir á skotskónum með unglingaliðum Liverpool og Arsenal í gær.

Kristján Gauti skoraði í sigri 18 ára liðs Liverpool á Manchester City og Ingólfur skoraði í 1-2 tapi 16 ára liðs Arsenal fyrir Fulham. Þetta kemur fram á vefmiðlinum fotbolti.net.

Kristján Gauti Emilsson skoraði sigurmark 18 ára liðs Liverpool á móti Manchester United á dögunum en í gær hjálpaði hann Liverpool-liðinu að vinna 2-1 sigur á hinu Manchester-liðinu, Manchester City.

Ingólfur Sigurðsson er nýbúinn að gera samning við KR en hann er á reynslu hjá Arsenal. Ingólfur náði að jafna leikinn fyrir Arsenal í gær en samkvæmt heimildum vefmiðilsins fótbolti.net. þá var hann einn af betri mönnum vallarins og átti mjög góðan leik.