Barcelona hefur ekki gefist upp á Mascherano

Pep Guardiola, þjálfari Barcelona, segir að dyrnar standi opnar fyrir Javier Mascherano ef hann vill koma. Barcelona er sagt hafa gert Liverpool tilboð í leikmanninn en það sé allt of lágt.

Guardiola segist ekki vita hvernig samningaviðræðurnar gangi en vill tala við Mascherano ef hann kíkir í heimsókn til Spánar.

"Ég tala við hann ef hann kemur. Ég veit annars ekkert hvernig þetta mál gengur. Þið verðið að ræða það við Zubizarreta," sagði Guardiola en gamli markvörðurinn er orðinn íþróttastjóri hjá Börsungum.

"Ef við fáum varnarsinnaðan miðjumann þá erum við klárir í bátana. Ég er meira en sáttur við einn slíkan til viðbótar."