Liggur ekkert á að selja Mascherano

Stjórn Liverpool liggur ekkert á að selja Javier Mascherano og ætlar að bíða eftir ásættanlegu tilboði. Þetta fullyrðir fréttastofa Sky Sports í kvöld.

Liverpool hefur þegar hafnað tilboði upp á sextán milljónir punda frá Barcelona en Mascherano spilaði ekki með liðinu gegn Manchester City í gærkvöldi.

Roy Hodgson, stjóri Liverpool, segir að Mascherano sé afar óánægður og vilji ólmur fara til Barcelona áður en félagaskiptaglugginn lokar þann 1. september næstkomandi.

Hann æfði þó með liðinu í dag enda er Hodgson harðákveðinn í því að selja ekki Mascherano fyrir minna en uppsett verð. Liverpool er sagt vilja fá 25 milljónir fyrir kappann.

Liverpool er mjög skuldsett en þrátt fyrir það hefur stærsti lánardrottinn félagsins, Royal Bank of Scotland, ekki þrýst á félagið að selja leikmanninn.

„Sala upp á sextán milljónir punda hefur í raun lítið að segja þegar heildarskuldir eru upp á 350 milljónir," er haft eftir heimildamanninum.